ദോഹ : ഇറാൻ തൊടുത്തുവിട്ട ഡ്രോണുകളും മിസൈലുകളും ഉപയോഗിച്ചുള്ള വ്യോമാക്രമണങ്ങളെ ഖത്തർ സായുധ സേന വിജയകരമായി പ്രതിരോധിച്ചതായി പ്രതിരോധ മന്ത്രാലയം അറിയിച്ചു. ഖത്തറിന്റെ യുദ്ധവിമാനങ്ങളും വ്യോമ പ്രതിരോധ സംവിധാനങ്ങളും (Air Defense Systems) സംയുക്തമായാണ് ഈ ആക്രമണങ്ങളെ നേരിട്ടത്.ഖത്തറിന്റെ ആകാശപരിധിയിലേക്ക് കടന്ന ഉടൻ തന്നെ നിരീക്ഷണ സംവിധാനങ്ങൾ (Monitoring and Early Warning Systems) ഈ ലക്ഷ്യങ്ങളെ തിരിച്ചറിഞ്ഞു. തുടർന്ന് കൃത്യമായ ചട്ടങ്ങൾ പാലിച്ച് ഇവയെ പിന്തുടരുകയും ആകാശത്തുവെച്ച് തന്നെ വെടിവച്ചിടുകയും ചെയ്തു.ഓപ്പറേഷനിൽ ആളപായമോ മറ്റ് നാശനഷ്ടങ്ങളോ രേഖപ്പെടുത്തിയിട്ടില്ല. ഖത്തർ സായുധ സേനയുടെ പൂർണ്ണ സജ്ജീകരണവും സംയോജിത വ്യോമ പ്രതിരോധ സംവിധാനവുമാണ് ആക്രമണത്തെ ഫലപ്രദമായി ചെറുക്കാൻ സഹായിച്ചത്.നിലവിൽ സ്പെഷ്യലൈസ്ഡ് ടീമുകൾ മുൻകരുതൽ നടപടികളും നാശനഷ്ടങ്ങൾ ഉണ്ടായോ എന്നതിനെക്കുറിച്ചുള്ള വിലയിരുത്തലുകളും നടത്തിവരികയാണ്.രാജ്യത്തിന്റെ പരമാധികാരവും വ്യോമപരിധിയും സംരക്ഷിക്കുന്നതിനായി ആവശ്യമായ എല്ലാ നടപടികളും ഖത്തർ തുടർന്നും സ്വീകരിക്കുമെന്ന് മന്ത്രാലയം വ്യക്തമാക്കി. ഔദ്യോഗിക ചാനലുകൾ വഴി സ്ഥിതിഗതികൾ നിരീക്ഷിച്ചുവരികയാണെന്ന് മന്ത്രാലയം പറഞ്ഞു
